Spurt og svarað

Svo lengi sem þess er gætt að fá leyfi hjá landeigendum og að hreinsað sé í sátt og samlyndi við lífríkið á svæðinu er öllum frjálst að skipuleggja strandhreinsun.

Hreinsun þarf að undirbúa vel, velja þarf stað, finna leið til að koma því sem safnast í endurvinnslu og auðvitað safna liði. Nánari upplýsingar um fyrstu skrefin má finna hér. Við hvetjum ykkur til að skrá hreinsunina ykkar svo við getum birt hana á Íslandskorti Hreinsum Ísland. 

Landvernd vill gera því góða starfi sem er unnið í landinu hátt undir höfði og gera sýnilegt á Íslandskorti verkefnisins. Samtakamáttur er mikill og gæti veitt fólki byr undir báða vængi til að skipuleggja sína eigin strandhreinsun.

Landvernd vill komast að því hvaðan ruslið kemur svo hægt sé að ráðast gegn rótum vandans og koma í veg fyrir að vandinn viðhaldist, eða aukist. Mikilvægt er að flokka ruslið sem er tínt og koma því til endurvinnslu. Ef ruslið er ekki flokkað heldur allt sett í sama pokann verður það grafið í jörðu á næsta urðurnarstað.

Mikilvægt er að koma sprautunálum og öðrum hættulegum hlutum í ílát eins og t.d. hálfs lítra plastflösku. Að því loknu skal koma henni til förgunar.

Víða um land gengur fólk með girðingum á vorin og hreinsar landareignir sínar. Gott er að hreinsa áður en varp hefst en vegna varptíma í maí og júní þarf að gæta varúðar í návist varpstaða. Tilvalið er að taka til hendinni að loknu varpi í ágúst og hreinsa fram á vetur.

Veita þarf þátttakendum góðar upplýsingar og stuðning. Gott er að hafa gáma/söfnunarstaði á fyrirfram ákveðnum stöðum, svo fólk viti hvert á að koma með ruslið. Gæta þarf öryggis í öllu. Sjá nánari upplýsingar um framkvæmd strandhreinsunar hér.

Gott er að deila myndum úr hreinsuninni og segja fólki frá því magni sem þið söfnuðuð. Eins má senda upplýsingar um hreinsunina til Landverndar. Sjá nánar hér.

Project Image