Fréttir

Myndasýning og kaffispjall í dag kl.18 á Austurvelli

Salome Hallfreðsdóttir    29.1.2014
Salome Hallfreðsdóttir

Landvernd býður öllum félagsmönnum og áhugafólki um vernd hálendisins í kaffispjall og myndasýningu á Austurvelli í dag, miðvikudag 29. janúar, milli kl. 18 og 19.

Þingmönnum hefur verið boðið að koma og ræða við okkur um þær framkvæmdir sem fyrirhugaðar eru á hálendinu og þá sýn Landverndar að ekki beri að fórna fleiri náttúruperlum á svæðinu, heldur að vernda það gegn umræddum framkvæmdum.

Uppi eru hugmyndir um vel á annan tug virkjana með tilheyrandi háspennulínum, uppbyggða vegi um Kjöl og Sprengisand, að ógleymdri stórri háspennulínu yfir Sprengisand. Framkvæmdirnar, ef fram ná að ganga, munu eyðileggja hálendið í þeirri mynd sem við þekkjum það.

Í september í fyrra hóf Landvernd sérstakt baráttuverkefni til varnar hálendi Íslands sem ber heitið: Hálendið – hjarta landsins. Þessi viðburður er hluti af því verkefni. Á vefsíðunum www.hjartalandsins.is og http://heartoficeland.org er umfjöllun um fyrirhugaðar framkvæmdir á hálendinu og gefst fólki kostur á að skrifa undir þá kröfu Landverndar að hlífa hálendi Íslands.

Verið öll velkomin í dag á Austurvöll í Reykjavík.

Með góðum kveðjum,

stjórn og starfsfólk Landverndar.

 


Vista sem PDF

 

Stöndum vörð um náttúru Íslands

Taktu afstöðu og vertu með!

Leita í fréttum