Haustfréttabréf Bláfána

Bláfáninn 30 ára

Þá fer Bláfánatímabilinu senn að ljúka hjá mörgum Bláfánahandhöfum. Meirihluti handhafa flaggar vottuninni fram undir lok september en þó fjölgar ört í þeim hópi sem bera vottunina allt árið um kring. Aldrei hafa fleiri flaggað Bláfánanum á Íslandi en í ár. Sex smábátahafnir, þrjár baðstrendur og fimm fyrirtæki í sjávarferðamennsku með alls 30 báta fengu viðurkenninguna.

Bláfáninn var stofnaður árið 1987 og er verkefnið því 30 ára í ár. Afmælinu hefur verið fagnað víðsvegar um heim með ýmsum uppákomum og sérstökum viðburðum. Á fréttasíðu Blue Flag International má finna fréttir um viðburðina.

Plastmengun í hafi er verkefni sem Landvernd hefur lagt ríka áherslu á undanfarin misseri. Hreinsum Ísland verkefninu var hleypt af stokkunum í vor en auk þess tókum við þátt í norrænni rannsókn á uppruna plasts sem finnst hér við strendur. Niðurstöður þessarar rannsóknar munu liggja fyrir í nóvember. Mikil þörf er á áframhaldandi vitundarvakningu um plastmengun í hafi og hvetjum við Bláfánahandhafa til þess að leggja þessu málefni lið með einum eða öðrum hætti.

Urtan í Surtsey

Í myndasafninu má sjá urtu sem fannst í byrjun september í Surtsey. Urtan var með kaðal þrengdan um hálsinn. Hún var á lífi þegar hún fannst en erfiðlega gekk að ná henni og bjarga. Fleiri myndir af urtunni má finna hér. Kaðall sem þessi er búinn til úr plasti. Plastmengun í hafi er stór áskorun á Íslandi líkt og annars staðar í heiminum. Mælingar sýna að magn plasts í lífverum sem finnast dauðar hér við land er svipað mikið og í nágrannalöndum okkar. Fuglar, fiskar og hvalir halda að plastið í sjónum sé fæða og verður meint af.

Hreinsum Ísland og Plastlaus september

Í tilefni af Degi íslenskrar náttúru þann 16. september og Plastlausum september hvetur Landvernd landsmenn til að huga að plastnotkun sinni og minnka notkun á óþarfa einnota plastumbúðum, ásamt því að flokka það plast sem fellur til. Plast hefur neikvæð áhrif á lífríki sjávar en talið er að um 8 milljón tonn af plasti endi í sjónum árlega. Tölur frá Sameinuðu þjóðunum sýna að 80% plasts í hafi kemur frá landi. Landvernd hvetur því einstaklinga, hópa og fyrirtæki til að hreinsa sitt nánasta umhverfi af plasti og öðru rusli fyrir komandi haustlægðir. Á síðunni Hreinsum Ísland má finna góð ráð fyrir þá sem hyggjast taka til hendinni.

Haustfréttabréf Bláfánans var sent út í dag og má nálgast í heild sinni hérna.


Tögg
thomas-kelley-63615.jpg  Urtan i Surtsey  Plastaskorun  Hreinsum Island  Blafani 30 ara 
Vista sem PDF