Fréttir

Grænfáninn um allt land 30. júní 2009 - Grænfáninn Nú eru rétt tæplega 160 skólar á grænni grein á öllum skólastigum hérlendis; 70 leikskólar, 78 grunnskólar, 7 framhaldsskólar og 2 háskólar. Þá eru tveir aðrir skólar, Vinnuskóli Reykjavíkur og Náttúruskóli Reykjavíkur, þátttakendur í verkefninu. Heildarfjöldi þeirra nemenda sem taka þátt í verkefninu er því rétt ríflega 30.100 eða tæplega 28% af öllum nemendum þessara skólastiga á landsvísu. Á því skólári sem senn er að ljúka hafa rúmlega 40 skólar bæst í þennan góða hóp. Það er því gleðileg aukning í fjölda skólanna. Á skólaárinu fengu 30 skólar Grænfána afhentan til tveggja ára, þar af 20 skólar í fyrsta skiptið. Þá ætla 18 skólar að hefja næsta skólaár á því að flagga Grænfánanum – alþjóðlegri viðurkenningu fyrir störf að umhverfismenntarmálum og menntun til sjálfbærrar þróunar. Alls eru 27.000 skólar úti um víða veröld sem taka þátt í þessu verkefni og í þeim eru sex milljónir nemenda. Myndirnar með fréttinni eru teknar við afhendingu Grænfánans í Leikskólanum Furugrund í Kópavogi 4. júní síðastliðinn. Þetta var jafnframt fyrsti Grænfáninn sem Svandís Svavarsdóttir umhverfisráðherra afhendir fyrir hönd Landverndar og fyrsti fáninn sem Leikskólinn Furugrund fær. Myndirnar tók Guðmundur Hörður Guðmundsson.

Til baka