Fréttir

Tæplega 170 Skólar á grænni grein 22. janúar 2010 - Grænfáninn Svandís Svavarsdóttir umhverfisráðherra afhenti nemendum og starfsfólki leikskólans Furugrundar í Kópavogi Grænfánann fyrir hönd Landverndar í fyrsta sinn sl. sumar. Níunda starfsár Skóla á grænni grein er nú hálfnað. Á annan tug skóla hefur bæst í hópinn það sem af er þessu skólaári og ekkert lát á umsóknum. Í upphafi skólaársins 2001-2002 voru tólf grunnskólar sem riðu á vaðið með þátttöku í verkefninu en nú eru skólarnir tæplega 170 á öllum skólastigum vítt og breitt um landið. Ríflega helmingur þessara skóla hefur hlotið alþjóðlegu viðurkenninguna Grænfánann fyrir sitt starf að umhverfismálum og umhverfismennt. Í þónokkrum tilfellum hefur skólafólk viljað nýta sér vorið til þess að sækja um í fyrsta sinn eða endurnýja Grænfánann og fá hann afhentan. Er það vel. Til þess að allt gangi snuðrulaust fyrir sig þarf umsókn um Grænfána að hafa borist á netfangið graenfani@landvernd.is fyrir 1. mars nk. sé hugmyndin sú að flagga á komandi vori. Allar nánari upplýsingar um umsóknarferlið er að finna hér á heimsíðu Landverndar. Frá fánaafhendingu í leikskólanum Steinahlíð vorið 2009. Björgólfur Thorsteinsson formaður Landverndar afhenti leikskólanum Grænfánann í þriðja sinn.

Til baka