Árangur

Að hausti 2008 hafa um 800 heimili tekið þátt í Vistvernd í verki, víðsvegar um landið. Í nokkrum sveitarfélögum hefur hlutfall þátttakenda farið upp yfir 20% íbúa og verkefnið því haft mikil áhrif á umræðu og þróun umhverfismála og sjálfbærrar þróunar á staðnum. Þátttakendur í visthópum gera mælingar í byrjun og lok þátttöku til að athuga neyslumynstur sitt og árangur. Komið hefur í ljós að með lífsstílsbreytingum létta þeir mjög álaginu á umhverfið og spara umtalsverðar fjárhæðir eftir að hafa tekið þátt í verkefninu. Erlendar og íslenskar kannanir á langtímaáhrifum verkefnisins gefa afar jákvæðar niðurstöður og sýna að þátttaka í verkefninu gefur varanlegan árangur. Sorp Þyngd sorps frá heimilum minnkar við þátttöku í visthópi um að meðaltali 34%. Þetta gerist vegna þess að flestir fer í meira mæli að skila flokkuðu sorpi til endurvinnslu, einhverjir koma sér upp jarðgerðarkassa í garðinn en síðast en ekki síst vegna þess að sorpmagnið sem kemur inn á heimilið minnkar. Þetta er gert með því t.d. að kaupa ekki óþarfa, sleppa óþarfa umbúðum og afþakka fjölpóst. Meðalþyngd sorps sem fer í tunnuna á ári, fyrir hvern einstakling á heimili, eftir þátttöku í visthópi, er 106kg sem er minna en helmingur af því sem meðal höfuðborgarbúi hendir í tunnuna. (Meðalsorpmagn frá hverjum höfuðborgarbúa á árinu 2007 var 223 kg.) Ef við tökum dæmi um Reykjavíkurbúa sem hefur tök á því að breyta losunartíðni sorptunnu sinnar (fá sér græna tunnu) eða fækka fjölda tunna við fjölbýlishús sitt (með samþykki annarra íbúa) þá getur hann lækkað sorphirðureikning sinn um helming, úr 16.300 kr. á ári, niður í 8.150 kr. (Sjá upplýsingar um sorphirðu á vefsíðu sveitarfélags). Rafmagn Rafmagnsnotkun á heimilum minnkar að meðaltali um 15%. Að meðaltali minnka heimilin rafmagnsnotkun um 913 kílóvattstundir á ári sem samsvarar 8300 kr. á ári miðað við verðskrá Orkuveitu Reykjavíkur í október 2008. Heitt vatn Heitavatnsnotkun á heimilum minnkar að meðaltali um 21%. Að meðaltali minnka heimilin heitavatnsnotkun á ári um 200 rúmmetra. Miðað við verðskrá Orkuveitu Reykjavíkur í október 2008 þýðir það að heimilin spara 15.400 kr. á ári. Samgöngur Eldsneytisnotkun á heimilum minnkar að meðaltali um 13%. Að meðaltali sparar hvert heimili 208 lítra af eldsneyti á ári. Ef við miðum við eldsneytisverð í lok október 2008, kr. 154, spara heimilin því 32.000 kr. á ári. Þetta gera þau meðal annars með því að nýta aðra samgöngukosti betur, en mörg dæmi eru um að eldsneytisnotkun minnki þó jafnmargir kílómetrar séu eknir. T.d. við breytt ökulag eða stillingu á vél. Innkaup Hlutfall umhverfismerktra vara af öllum vörum sem fólk kaupir eykst að meðaltali úr 11% í 15%. Flestir spara umtalsvert í innkaupum eftir að hafa yfirfarið þau og skipulagt betur, en á því eru ekki gerðar mælingar. Miðað við þessar tölur geta þátttakendur hæglega gert ráð fyrir því að spara árlega um 64.000 kr. á ári vegna auðveldra og jákvæðra breytinga á lífsstíl. Í bónus fá þátttakendur að breytingarnar spara auðlindir og minnka mengun og eru margar hverjar til heilsubótar. Í verkefninu er enda ætíð reynt að taka tillit til einstaklingsþarfa og heimilisrekstrar á heildstæðan hátt en ekki að einangra umhverfisþætti frá öðrum þáttum. Vinnustaðir sem hafa tekið þátt í verkefninu Sértu að velta fyrir þér að taka þátt í visthópi skal á það bent að það sem kemur flestum á óvart við þátttökuna er...... .... hvað hún er skemmtileg!!

Vinnustaðir sem hafa tekið þátt í verkefninu