Stjórn Landverndar tekur undir þá niðurstöðu Skipulagsstofnunar að umhverfisáhrif námuvinnslu upp á Ingólfsfjalli séu óásættanleg.
Ingólfsfjall er mikilvægt kennileiti á Suðurlandi. Fjallið er áhugaverð jarðmyndun sem er einkennandi fyrir Ísland. Ingólfsfjall hefur menningarsögulegt gildi þar sem það ber nafn fyrsta landsnámsmannsins. Ingólfsfjall er vinsælt til fjallgöngu og er mikilvægt vatnsból.
Efnistaka í fjallshlíðum Ingólfsfjalls hefur lengi verið umdeild vegna sjónmengunar og verið til vitnis um þá staðreynd að stjórnvöld skortir úrræði til að ná tökum á þeim umhverfisvanda sem fylgir stjórnlausri efnistöku í gömlum námum.
Á árinu 2004 hófst efnistaka uppi á Ingólfsfjalli undir því yfirskyni að um sömu námu væri að ræða og námuna í hlíðum Ingólfsfjalls. Þetta malarnám hefur verið stöðvað og framhald þess ræðst af niðurstöðu Skipulagsstofnunar og ákvörðun sveitarstjórnar.
Niðurstaða Skipulagsstofnunar nú staðfestir það álit stjórnar Landverndar að efnistaka upp á Ingólfsfjalli hefði víðtæk umhverfisáhrif. Stjórnin hvetur viðkomandi sveitarstjórn að taka ábyrga afstöðu í þessu máli og fara að vel rökstuddu áliti Skipulagsstofnunar.
Stjórn Landverndar telur brýnt að sveitastjórnir á Suðurlandi kanni valkosti til efnistöku á svæðinu til að mæta mikill þörf fyrir byggingarefni í landshlutanum. Velja ber efnistökustaði sem valda minni umhverfisáhrifum en nám upp á Ingólfsfjalli, jafnvel þó það kunni að kosta meira. Ef tekið væri tillit til umhverfiskostnaðar við malarnám á Ingólfsfjalli væri raunverulegur kostnaður vegna malarnáms þar mun meiri en fram kemur í bókhaldi.
