Project Image

Landvernd leitast við að hafa áhrif á stefnumótun og ákvarðanatöku í umhverfismálum með því að senda inn umsagnir um frumvarpsdrög, þingmál, skipulagsáætlanir, einstakar framkvæmdir og margvíslega áætlanagerð sem viðkemur umhverfismálum.

Akstur utan vega - málþing laugardag

Landvernd    29.4.2005
Landvernd

Því miður hafa fjölmargar vísbendingar komið fram undanfarin misseri um að akstur utan vega fari vaxandi. Þegar ekið er um landið má víða sjá vegaslóða sem virðast ekki þjóna neinum tilgangi. Enn virðast Íslendingar fara um óbyggðir og öræfi til þess eins að sýna hversu megnug tæknin er í höndum mannsins. Þetta hátterni skilur eftir sár sem eru lýti í landinu auk þess sem þau geta komið af stað jarðvegsrofi. Landgæði eru rýrð og náttúrunni og komandi kynslóðum er sýnd ótrúleg lítilsvirðing með þessum hætti. Við þessu þarf að bregðast.

Laugardaginn 30. apríl kl. 13:00-17:00 verður haldið málþing um akstur utan vega á vegum Landverndar og Umhverfisstofnunar í sal Ferðafélags Íslands í Mörkinni 6 í Reykjavík. Á málþinginu verður fjallað um akstur utan vega frá ýmsum sjónarhornum með pallborðsumræðum í lokin. Megináhersla verður lögð á varpa ljósi á hvar vandinn liggur og að greina hvað er til ráða.

Davíð Egilsson forstjóri Umhverfisstofnunar setur málþingið og í kjölfarið mun Eymundur Runólfsson forstöðumaður hjá Vegagerðinni fjalla um vegaskilgreiningar og umfang utanvegaumferðar. Halldór Jónsson í Gæsavatnahópnum mun í framhaldinu ræða um ástæður og afleiðingar utanvegaakstur og Freysteinn Sigurðsson varaformaður Landverndar, um galla á lagalegu umhverfi.

Umhverfisráðuneytið skipaði haustið 2004 starfshóp sem vinnur að því að gera tillögur um hvaða vegir og slóðar í óbyggðum skuli teljast vegir með hliðsjón af afdráttarlausu ákvæði um bann við akstri utan vega í náttúruverndarlögum. Hópinn skipuðu þau Árni Bragason, sviðsstjóri náttúruverndar hjá Umhverfisstofnun, en hann er formaður hópsins, Eydís Líndal Finnbogadóttir frá Landmælingum Íslands og Eymundur Runólfsson frá Vegagerðinni. Þau Eydís og Árni munu kynna niðurstöður nefndarinnar. [sjá skýrsluna hér] Að því loknu greinir Sigríður Anna Þórðardóttir umhverfisráðherra frá því hvernig áformað er að fylgja tillögum nefndarinnar eftir.

Í lokin verða síðan pallborðsumræður um aðstæður og hagsmuni ólíkra aðila.

Björgólfur Thorsteinsson formaður Landverndar stjórnar málþinginu.

Boðið verður upp á kaffiveitingar. Aðgangseyrir er 500 kr.

Tögg

Vista sem PDF

Leita í umsögnum

 

Landvernd eru frjáls félagasamtök sem starfa
að umhverfismálum. 
Taktu afstöðu og vertu með!