Verndum lífbreytileikann og opnum hótel. Skordýrahótel veitir fyrir pöddum og smádýrum skjól fyrir veðri.

Skordýrahótel eða pödduhótel veita skordýrum og áttfættlingum öruggt skjól.

Opnum hótel

Það er mikilvægt að tryggja smádýrum gott búsvæði. Auka má heimsóknir smádýra á skólalóð eða í garð með því að búa til skordýrahótel. Notast má við allskyns náttúrulegan efnivið og útbúa stór og smá herbergi.

Án smádýra væru engir ávextir

Smádýrin eru mikilvægur hlekkur í lífríkinu á jörðinni. Flugur ferðast á milli blóma og drekka blómasafa. Í leiðinni fá þær á búkinn frjókorn sem þau fljúga með á næsta blóm og þannig frjóvgast blómin og þá verða til ávextir og fræ.

Skordýrahótel veitir skjól í kulda

Skordýrahótel geta verið góður felustaður fyrir smádýr og veitir skordýrum skjól fyrir veðri og vindum og dýrum sem vilja éta þau.

Pödduhótel í Englandi.

Hvernig gerum við skordýrahótel?

Það er engin ein rétt leið til að gera skordýrahótel. Til eru margar útfærslur, stórar og smáar og misjafnt er hvað hentar fólki. 

Efni sem þarf til

Ómálað/óvarið timbur. Best er að nýta efnivið sem fellur til í stað þess að kaupa nýtt.

Gott er að hafa skæri og snæri (bómullarsnæri eða ull) við höndina. 

Náttúrulegur efniviður: Könglar laufblöð, greinar, sprek o.s.frv.

Verkfæri: Hamar eða borvél, naglar/skrúfur, sög. 

Það sem þarf að hafa í huga

Setjið skordýrahótelið á sólríkan stað
Skordýrum líður vel í hlýju lofti og því er gott að setja skordýrahótelið á stað sem sólin skín, t.d. sunnan við húsið.

 
Skordýrahótel veitir smádýrum skjól.
Notast má við fjölbreyttan náttúrulegan efnivið.

Notið fjölbreytt náttúruleg byggingarefni

Mikilvægt er að nota náttúrulegefni sem innihalda ekki málningu og efni sem geta verið eitruð skordýrum. Bambusprik og önnur efni sem eru hol að innan veita mörgum smádýrum skjól. Börkur, könglar, greinar (stórar og smáar), bylgjupappi og sprek geta gagnast vel.

Notið efni sem væri annars hent

Gott er að byggja einhversskonar ramma eða kassa og setja nokkrar hæðir (hillur) í hótelið. 
Mismunandi efni er svo sett í hverja hillu. T.d. laufblöð, sprek, tómar klósettrúllur með laufblöðum, könglum og svo framvegis. 
 

Búið til skjól  

Útbúið með fyrrnefndum efnum litlar holur, göng og lítil dimm rými þar sem skordýrin geta varist veðri og vindum og falið sig fyrir dýrum sem vilja éta þau. 

Pödduhótel á Laugarvatni. Nemendur í Bláskógaskóla smíðuðu hús sem er skordýrahótel.

Nemendur í Bláskógaskóla Laugarvatni eru að byggja pödduhótel við skólann. Skólinn er þekktur fyrir mikið útinám og er útiskóli fastur í stundartöflu á miðvikudögum allt skólaárið um kring. Bláskólaskóli er grænfánaskóli á grænni grein.

Lífbreytileiki er mikilvægur fyrir lífið á jörðinni

Þróun lífvera á jörðinni hefur tekið milljónir ára og á þessum tíma hafa þróast ótal tegundir lífvera. Ein af nauðþurftum allra lífvera er skjól. Við getum stutt við smádýrin með því að tryggja þeim búsvæði í okkar umhverfi. Við getum gert það með því að viðhalda náttúrulegum gróðri og villigörðum. Svo má auðvitað búa til skordýrahótel. 

Lífbreytileiki er mikilvægur fyrir lífríkið á jörðinni því að með því að hafa margar og ólíkar lífverur er lífríkið betur í stakk búið til að takast á við breytingar í umhverfinu og lifa af. Ef allir eru eins þá geta breytingar haft alvarleg áhrif á lífríkið. 

Lífbreytileiki, einnig kallaður líffræðilegur fjölbreytileiki, felur í sér fjölbreytileika allra lífvera, þ.e. plantna, dýra, sveppa og örvera. En lífverur af sömu tegund geta líka verið ólíkar. Horfðu yfir vinnufélaga eða fjölskyldu og sjáðu hvað allir eru ólíkir. Þessi breytileiki er einnig hluti af lífbreytileika. Dæmi um ólíkar tegundir lífvera: sveppur, fluga, refur, amaba og hvalur.

Lífbreytileiki er eitt af þemum Skóla á grænni grein

Skólar á grænni grein stíga skrefin sjö. Þau eru hugsuð sem verkfæri sem skólar geta notað til að koma á breytingum í átt að sjálfbærni sem eru mótaðar og innleiddar á lýðræðislegan hátt. 

 

Skólar á grænni grein vinna að einu til tveimur þemum á hverju grænfánatímabili sem stendur að jafnaði í tvö ár.

Grænfánanefnd metur stöðu mála í skólanum með tilliti til þemans og setur svo fimm til sex markmið sem unnið er að í skólanum. 

Lífbreytileiki er eitt af þeim þemum sem skólar geta valið um og er vinsælt að kortleggja lífbreytileika á skólalóðinni og setja upp skordýrahótel. 

Ítarefni

 

Pödduvefur Náttúrufræðistofnunar Íslands

Líf á landi eftir Sólrúnu Harðardóttur 

Geitungar á Íslandi eftir Erling Ólafsson 

Humlur – Milli himins og jarðar eftir Hörpu Jónsdóttur