Tími: 20 mín 

Markmið:  

• Að kveikja áhuga nemenda á loftslagsmálum 
• Að nemendur átti sig á því hvað þeir vita um málið og hvað vantar  
• Að nemendur mynda sér skoðanir og eru óhræddir við að deila þeim 

Framkvæmd: 

Allir eru í stofu þar sem heil lína milli veggja er laus. Kennarinn leggur niður blað þar sem stendur á sammála í vinstra hornið á stofunni, blað þar sem stendur á veit ekki í miðjuna og blað þar sem stendur á ósammála í hægra hornið. Síðan kemur kennarinn fram með eina og eina yfirlýsingu og eiga nemendur að fara á þann stað í stofunni sem er í samræmi við svar þeirra við yfirlýsingunni sem kennarinn setti fram. Dæmi um yfirlýsingar:  

• Ég skil hvað sjálfbær þróun þýðir 
• Ég hef kynnt mér Heimsmarkmið SÞ um sjálfbæra þróun 
• Réttlæti innan og milli kynslóða er lykillinn til þess að ná fram sjálfbærri þróun 
• Ég skil af hverju loftslagsbreytingar verða og hvaða orsakir liggja að baki 
• Loftslagsbreytingar munu ekki hafa áhrif á mitt líf 

• Loftslagsbreytingar hafa nú þegar áhrif, sérstaklega á fólk í fátækum löndum 
• Afleiðingar loftslagsbreytinga gætir nú þegar hér á Íslandi 
• Lífsstíllinn í ríkum löndum eins og á Íslandi þarf að breytast og til þess að ná árangri í losun gróðurhúsalofttegunda þarf hver og einn að vera virkur í aðgerðum og taka ábyrgð. 

• Ég er búin að gera breytingar á lífsstílnum mínum til þess að minnka umhverfisáhrif og er tilbúin í að taka fleiri skref 
• Stjórnvöld alls staðar í heiminum þurfa að gera meira til að vinna gegn losun gróðurhúsalofttegunda 
• Íslensk stjórnvöld eru nú þegar að vinna á metnaðarfullan hátt að loftslagsmálum 
• Ég er með loftslagskvíða 

Þegar þessu er lokið leiðir kennarinn nemendur í gegnum stutt spjall. Dæmi um spurningar:  

• Hvaða skoðanir eru oftast til staðar varðandi umhverfismál og af hverju? 
• Hafa orðið breytingar á skoðunum í gegnum þennan leik? 
• Hvað vitið þið mikið um loftslagsvána og um aðgerðamöguleika? 

Verkefnið er hluti af óútgefinni handbók eftir Guðrúnu Schmidt um menntun til sjálfbærni sem gefin verður út af Skólum á grænni grein, Landvernd og Menntamálastofnun