Atkvæðisrétt á aðalfundi hafa skráðir félagar sem greitt hafa félagsgjald undanfarins starfsárs a.m.k. viku fyrir aðalfundinn. Hið sama gildir um fulltrúa aðildarfélaga, fyrirtækja og stofnana sem eru í Landvernd. Málfrelsi, rétt til setu og tillögurétt á aðalfundi hafa allir skráðir félagar í Landvernd.

Skilningsleysi og neikvætt viðhorf gagnvart náttúru Íslands

Aðalfundur Landverndar ályktar að bregðast verði af fullum þunga við skilningsleysi og neikvæðu viðhorfi gagnvart náttúru Íslands sem birtist hvívetna í málflutningi og aðgerðum ráðamanna. Náttúra Íslands er oft álitin vettvangur til gjörnýtingar í stað náttúruverndar. Það birtist í orkuvinnslu á spretti í gagnaverakapphlaupinu, kvótasetningu náttúruperlna til stórra aðila í ferðaþjónustu og fjarða Íslands sömuleiðis til stórfyrirtækja í lagareldi.

Almannaréttur og verndun náttúrunnar fyrir komandi kynslóðir eru sjónarmið sem mega ekki verða undir. Þjóðlendur eiga að vera á forræði þjóðarinnar, ekki nýtingartækifæri einkaaðila. Mikil áform eða orðnar framkvæmdir eru innan þjóðlendna. Sem dæmi má nefna: Kjalalda, Skrokkalda, Kerlingarfjöll, Þjórsárdalur, Vaðalda, vindorkuver víða og fleira. Mikilvægt er að samráð við almenning og náttúruverndarsamtök sé aukið og náttúruverndarsjónarmið verði höfð í fyrirrúmi. Í samræmi við Árósarsáttmálann.

Aðalfundur Landverndar skorar á stjórnvöld að snúa frá hernaðinum gegn landinu, sem felst ekki síst í einföldun regluverks og flýtimeðferðum.

Loftgæði

Aðalfundur Landverndar ályktar að loftgæði innan borgarmarka í Reykjavík séu mikilvægt lýðheilsu og umhverfismál. Setja þarf tímasetta áætlun um bann við nagladekkjum innan borgarmarka til þess að draga úr svifryki, minnka viðhaldskostnað vega og stuðla að sanngjarnari nýtingu sameiginlegra innviða, ásamt því að leita fleiri leiða til að draga úr svifryksmengun.

Vindorka

Nú þegar vindorkuver Landsvirkjunar rís á hálendinu skorar aðalfundur Landverndar á stjórnvöld að láta þar staðar numið, læra af mistökunum, vernda víðerni og votlendi og hætta við frekari stóriðju í vindorku í ósnortinni náttúru á Íslandi.

Loftslag, landbúnaður og búvörusamningar

Aðalfundur Landvernd krefst þess að búvörusamningar verði endurskoðaðir með loftslagsmarkmið, líffræðilega fjölbreytni og heilbrigði jarðvegs að leiðarljósi.
Opinber stuðningur við landbúnað skal færast frá magnframleiðslu yfir í mælanlegan árangur í kolefnisbindingu, vernd vistkerfa og sjálfbæra landnýtingu.

Stuðningur ríkisins skal bundinn skýrum kröfum um sjálfbæra nýtingu og fæðuöryggi fyrir þjóðina, vernd jarðvegs og aðgerðir gegn losun, samhliða því að hvatar verði settir fyrir aðferðir sem byggja upp lífríki og seiglu vistkerfa.

Ræktun á repju til olíuframleiðslu getur verið hluti af loftslagslausnum innan landbúnaðar, ef hún er stunduð á forsendum auðgandi landbúnaðar sem verndar jarðveg og styður líffræðilega fjölbreytni.

 Sett verði skýr, tímasett markmið um umbreytingu landbúnaðar, þar sem:
– fyrir 2030 verði verulegur hluti opinbers stuðnings bundinn við mælanlegan árangur í kolefnisbindingu og vernd vistkerfa
– fyrir 2040 verði íslenskur landbúnaður orðinn leiðandi í auðgandi landnýtingu sem byggir upp jarðveg og líffræðilega fjölbreytni  

Landbúnaður á að vera hluti af lausninni.