Kristinn Haukur Skarphéðinsson dýravistfræðingur er látinn eftir skammvinn veikindi. Hann starfaði hjá Náttúrufræðistofnun Íslands í meira en 30 ár og hóf ferlinn undir leiðsögn dr. Finns Guðmundssonar fuglafræðings.
Kjörsvið Kristins Hauks var íslenski haförninn. Rannsóknir hans á lífsháttum og búsvæðum arnarins um áratuga skeið skipuðu honum í fremstu röð þeirra er fjölluðu um vöxt og viðgang arnarstofnsins á alþjóðavettvangi. Eftir Kristin Hauk liggur fjöldi ritrýndra greina og bókarkafla um fuglafræði og náttúrufræðileg málefni. Jafnframt vísindastörfum sínum lagði hann ríka áherslu á að miðla þekkingu á skýran og einfaldan hátt og vekja áhuga fólks á fjölbreytni og mikilvægi íslenskrar náttúru, einkum þó fugla.
Kristinn Haukur hafði mikinn áhuga á náttúruvernd, sérstaklega fuglaverndarmálum og kom mikið að þeim á árum áður, þegar Landvernd og Fuglaverndarfélagið deildu skrifstofu í góðu samstarfi Kristinn var þekkti nánast hvern stafkrók um sögu og fuglafánu Íslands, allt frá fyrstu höfundum á miðöldum. Hann rannsakaði hvað mest útbreiðslu fugla á Íslandi, en var sérfróður, ekki aðeins um erni heldur einnig hrafna. Kristinn Haukur var því okkar öflugasti sérfræðingur til varnar lífríki og fuglum í tengslum við áform um vindorkugarða á viðkvæmum svæðum síðustu árin og hann var ávallt reiðubúinn að gefa sér tíma, fræða og veita hinum ýmsu félagasamtökum í náttúruvernd gagnlegar upplýsingar.
Landvernd hefur því sannarlega notið frábærrar leiðsagnar og fræðslu Kristins Hauks Skarphéðinssonar á liðnum árum. Missirinn er mikill en náttúruverndin mun búa vel og lengi að þeirri arfleifð sem Kristinn lætur eftir sig og mun áfram nýtast komandi kynslóðum.
Landvernd vottar fjölskyldu Kristins Hauks dýpstu samúð og þakkar ánægjulega og árangursríka samfylgd gegnum árin.
