![Loading Viðburðir](https://landvernd.is/wp-content/plugins/the-events-calendar/src/resources/images/tribe-loading.gif)
- This viðburður has passed.
Jónsmessuganga – sumardagskrá Alviðru
23 júní @ 13:00 - 18:00
![](https://landvernd.is/wp-content/uploads/2024/05/Vidburdir-Alvidra-2024-1.jpg)
Sunnudag 23. júní kl. 13:00-18:00
Upp á Ingólfsfjall – Jónsmessuganga
Ingólfsfjall er 551 m hátt virðulegt móbergsfjall í Ölfusi. Fjallið er bratt á þrjá vegu, í vestur, austur og suður en aflíðandi til norðurs að bænum Litla-Hálsi. Fjallið er „bæjarfjall“ Selfyssinga og þangað sækja þeir neysluvatn sitt.
Ingólfsfjall er nefnt eftir Ingólfi Arnarsyni sem talinn er hafa verið fyrstur til að nema varanlega land á Íslandi. Hafði hann i vetursetu undir Ingólfsfjalli á leið til Reykjavíkur, að því er segir í Landnámu, og flutti frá Reykjavík gamall maður aftur að fjallinu og lauk þar ævidögum sínum.
Gengið verður frá bænum Alviðru (Sjá á korti) eftir merktri gönguleið um gönguskarð ofan við bæinn og upp að Inghól, þar sem Ingólfur landsnámsmaður var heygður. Þaðan er afar víðsýnt á góðum degi. Gangan upp og niður er brött og nokkuð erfið en gönguleiðin á fjallinu er auðveld. Ætla má að gangan taki um 4 klukkustundir.
Munið göngustaf, haldgóða skó, hlífðarföt og nestisbita. Leiðsögumaður er Tryggvi Felixson fv. formaður Landverndar sem oft hefur gengið á fjallið.
Boðið verður upp á kakó og kleinur í bænum að aflokinni göngu.
Þeim sem ekki treysta sér á fjallið er bent á ákaflega áhugaverða, fallega, vel merkta og auðfarna gönguleið um Öndverðarnes II meðfram Soginu og Hvítá. Leiðbeiningar um þessa gönguleið verða veittar í Alviðru áður en gangan á fjallið hefst.
Allir eru hjartanlega velkomnir, en gott væri að fá vísbendingu um fjölda gesta og göngumanna með að senda tölvupóst á alvidra@landvernd.is.
Alviðra er friðland og fræðslumiðstöð Landverndar. Öndverðanes II er eign Árnesinga og er einnig friðland með merktum gönguleiðum og opið almenningi.
Staðsetning Alviðru: https://ja.is/kort/?d=hashid%3AbqpbZ&x=402950&y=390092&type=map&nz=13.70
Í sumar stendur Alviðra fræðslusetur Landverndar fyrir öðrum skemmtilegum og fræðandi viðburðum. Dagskrá sumarsins hér: https://landvernd.is/sumardagskra-alvidru-2024/