HeidelbergCement Pozzolanic Materials hefur lagt fram matsáætlun vegna umhverfismats fyrir mölunarverksmiðju í Þorlákshöfn (í matsáætlun er tilgreint hvaða þætti ætlunin er að rannsaka þegar umhverfismatið er framkvæmt).
Stjórn Landverndar telur ávinning framkvæmdarinnar mjög lítinn og sé litið til allra samfélagsþátta séu áhrifin líklega mjög neikvæð. Í umsögn Landverndar eru gerðar margvíslegar athugasemdir, raunar hafnar Landvernd með öllu þeim áætlunum sem settar eru fram í matsáætluninni. Umsögnin í heild er aðgengileg neðst í greininni.
Vafasamir útreikningar um samdrátt í losun
Stjórn Landverndar telur að Skipulagsstofnun þurfi að yfirfara útreikninga í matsskýrslu og alhæfingar þar um samdrátt í losun gróðurhúsalofttegunda af framkvæmdinni.
Mikilvægasta aðgerðin til að draga úr losun frá steinsteypu í byggingum er að hanna og byggja með efnum sem valda sem minnstri losun og endurnýta þær byggingar sem fyrir eru. Margar nýjar lausnir eru við sjóndeildarhringinn þegar kemur að kolefnishlutlausum byggingum.
Nútímahraun njóta líka verndar
Þá segir að fyrirhugað framkvæmdasvæði séu ekki við eða nálægt náttúruverndarsvæðum öðrum en nútímahraunum og að uppbygging á svæðinu sé ekki talin hafa áhrif á náttúruverndarsvæði sem skilgreind eru í greinagerð núgildandi Aðalskipulags Ölfuss 2020- 2036. Hér er augljóslega um tilraun að ræða til að skrifa sig frá þeirri staðreynd sem náttúruverndarlögin kveða á um er varðar vernd nútímahrauna.
Ekki verður séð að mölunarverksmiðjan sé brýn samfélagsleg nauðsyn – eða standi fyrir hagsmuni sem réttlæta rask á þeim nútímahraunum sem ætlunin er að raska sbr. valkost 2 í matsáætlun.
