Landvernd leggur mikla áherslu á að vandað verði til verka við setningu nýrra laga, ekki hrapað að neinu og fyrst og síðast að ekki verði veiktar stoðir náttúru- og umhverfisréttar, staða almennings og annarra hagsmunaðila.
Landvernd leggur þunga áherslu á að ef ætlun er að gefa sveitarfélögum vald til ákvörðunar að flýta uppbyggingu vindorku með afgreiðsluvaldi verði settur um það skýr rammi í lögum. Sú leið sem kynnt var er að mestu óútfærð og gæta verður vandlega að hverju skrefi. Hér er líklega stærsti einstaki óvissuþátturinn sem getur haft úrslitaáhrif á afstöðu Landverndar til endanlegrar stefnu frá Alþingi.
Landvernd fylgist með hverju fram vindur og leggur frekara mat á mál sem koma til umsagnar þegar Alþingi hefur mótað sýn og gert drög að stefnu um nýtingu vindorku á Íslandi.