Skólar á grænni grein standa fyrir fundunum Gæðaskólar á grænni grein – Fundir skólastiga í febrúar og mars 2021.
Á fundinum kynnum við nýtt námsefni, ræðum um menntun til sjálfbærni og miðlum góðum og praktískum verkefnum frá skólum sem eru á grænni grein.
Öll velkomin
Fundirnir eru vettvangur fyrir skólafólk til að miðla, læra og tengjast öðrum í sömu sporum. Við beinum sjónum að því hvernig skólar vinna að menntun til sjálfbærni.
Fundurnir eru að þessu sinni opnir öllum, einnig þeim sem eru ekki skráðir á græna grein. Skólar geta sent eins marga fulltrúa á fundina og þeir vilja.
Fjarfundur
Fundurinn fer fram á Zoom. Athugið að sumir skólar geta aðeins tengst við Zoom í gegnum vafra. Hér eru leiðbeiningar um hvernig má tengjast ZOOM í gegnum vafra. Skólar sem hafa ekki leyfi til að hlaða niður forritinu (m.a. skólar í Reykjavík) geta tengst fundinum í gegnum vafra.
Skráðir þátttakendur fá sendan tengil á netfundarstað fyrir fundinn.
Dagskrá 8. febrúar 2021
13:00 – 13:30 Opnun, stutt skilaboð frá Skólum á grænni grein.
Guðmundur Ingi Guðbrandsson, Umhverfis- og auðlindaráðherra, opnar fundinn.
13:30 – 14:00 Nýjungar hjá Skólum á grænni grein.
Þátttakendur velja eina af tveimur vinnustofum:
- Lifandi náttúra – lífbreytileiki á tækniöld: Nýtt námsefni fyrir leikskóla þar sem lífbreytileiki er rauður þráður. Sigurlaug Arnardóttir kynnir.
- Skólar á grænni grein – leiðandi í menntun til sjálfbærni: Um Skóla á grænni grein og tengsl verkefnisins við menntun til sjálfbærni. Margrét Hugadóttir kynnir.
14:00-14:40 Brot af því besta: Reyndir grænfánaskólar kynna verkefni sem snúa að þverfagleika og þátttöku alls skólasamfélagsins.
Útikennsla – Norðurberg
Lóa Björk Hallsdóttir og Berglind Mjöll Jónsdóttir
Sagt verður frá flottum leiðum sem kennarar í Leikskólanum Norðurbergi nýta í útikennslu og umhverfisstarfi með 4-6 ára börnum.
Umhverfismennt með ungbörnum – Ungbarnaleikskólinn Ársól
Inga Dóra Magnúsdóttir
Umhverfismennt með ungbörnum er áskorun en mikilvægt verkefni. Ársól hefur unnið með þemun lífbreytileika, vatn, orku, neyslu og úrgang og lýðheilsu og fundið ótal verkefni og leiðir til þess að vinna með þemun. Það hefur gengið vonum framar. Á síðasta tímabili var unnið með birtingarmyndir vatns með ýmsum hætti. Einnig var lögð áhersla á að læra um hrafninn og aðra fugla.
14:40-15:00 Kaffihlé
15:00-15:20 Brot af því besta: Reyndir grænfánaskólar kynna verkefni sem snúa að þverfagleika og þátttöku alls skólasamfélagsins.
Ella umhverfisdúkka og grænfáninn – Fífuborg
Kolbrún G. Haraldsdóttir
Ella endurvinnsludúkka er fulltrúi Grænfánaverkefnisins í Fífuborg. Hugmyndin að nýta dúkku í skólastarfi með ungum börnum kom frá foreldri sem hafði góða reynslu af því. Brúðan er gömul dúkka sem fannst uppí skáp. Í takt við lýðræðisáherslu Grænfánaskóla var nafnið á Ellu valið lýðræðislega þar sem allir nemendur skólans fengu að kjósa um nafnið. Ella kemur mánaðalega inná hverja deild og fræðir um umhverfismál. Börnin tengja vel við Ellu, hún minni okkur á að haga hlutunum þannig að það sé best fyrir umhverfið.
15:20-15:45 20 ára afmælisár Skóla á grænni grein: Hvernig fögnum við saman? Hugstormun.
