Stjórn Landverndar telur Grænbók um líffræðilega fjölbreytni vel unna og gott plagg til fræðslu og frekari umræðu um verndun líffræðilegrar fjölbreytni.
Þó þarf að fjalla sérstaklega um slæmt ástand landsins og fjölda vistkerfa í hnignun eða sem eru hrunin í nýrri Grænbók um líffræðilega fjölbreytni íslenskra vistkerfa.
Í Grænbókinni verða ennfremur að koma fram aðgerðir til að stöðva ósjálfbæra landnýtingu, t.d. beit á illa förnu landi, sem og margvíslegar framkvæmdir inni á lítt röskuðum vistkerfum.
Stjórn Landverndar tekur ekki undir þá fullyrðingu að almennt megi ná fullnægjandi vernd án friðana.
Friðlýsingar eru einmitt öflugasta leiðin til verndar líffræðilegri fjölbreytni, þó verndun tegunda og búsvæða utan friðlýstra svæða og sérstakir samningar við landeigendur séu einnig gagnleg viðbót við formlega friðlýst svæði.