Í skýrslunni er ekkert fjallað um svifryksmyndun vegna slits á vegum, ekkert fjallað um útivist, ekki fjallað um ólík viðmið við útreikninga kolefnisspors. Og síðast en ekki síst er lítið fjallað um áhrif á landslag, ásýnd og jarðmyndanir.
Umhverfisáhrif – landslag og ásýnd
Ef af efnistökunni yrði myndu áhrifin á landslag og ásýnd svæðisins verða gríðarleg. Um leið yrðu mikil neikvæð áhrif á útivist og ferðaþjónustu. Mikil og mjög sýnileg atvinnustarfsemi á svæði þar sem áður var engin starfsemi hefði augljóslega gríðarleg áhrif.
Starfsemin á Mýrdalssandi yrði sýnileg frá mörgum gönguleiðum þar sem upplifunin af landinu yrði mun neikvæðari. Námuvinnslan sæist vel m.a. frá göngu á Hafursey, Hjörleifshöfða og gönguleiðum frá Þakgili, ásamt göngu á Mælifell og Afréttarleið. Þær síðastnefndu eru afar áhrifaríkar, þar sem gengið er um óbyggðir og náttúrufegurð og víðsýni er með eindæmum mikið.
Námuvinnslan hefði mjög neikvæð áhrif á landslag og ásýnd svæðisins næstu 100 árin að minnsta kosti. Þá hefði stöðug umferð flutningabíla allan sólarhringinn neikvæð áhrif á landslag og ásýnd um allt Suðurland.
Gögnum um framkvæmdina er verulega áfátt
Gögn sem lögð eru til grundvallar matsskýrslunni eru eingöngu skýrsla verkfræðistofu og ljósmyndir, en frekari gagna þarf að afla fyrir svo stórtækt inngrip í íslenska náttúru.
Meta þarf áhrif starfseminnar á Mýrdalssandi en ekki bara efnistökuna sjálfa. Matsskýrslan bendir til að framkvæmdaaðili og Efla geri sér ekki grein fyrir þessu, m.a. þar sem rætt er um rykmengun af akstri vörubíla en ekki umferðina sjálfa. Starfsmannaaðstaða, færibönd, ýmsar vélar, vörubílar og skurðgröfur að störfum allan sólahringinn munu sjást vel frá þeim vinsælu gönguleiðum sem áður voru nefndar.
Stjórn Landverndar hafnar því að áhrif á landslag og ásýnd verði óveruleg, heldur verða þau verulega neikvæð.
Umsögn Landverndar má finna í heild sinni hér undir.
