Í bréfi sem sent hefur verið stjórn Landsvirkjunar er þeim tilmælum beint til fyrirtækisins að það að leggi til hliðar fyrirliggjandi áform um virkjanir í Þjórsárverum og beita sér fyrir því að breytingum á skipulagi svæðisins verði frestað þar til gefist hefur gott ráðrúm til að skoða betur þær ábendingar sem koma fram í skýrslum þeirra Jack D. Ives og Roger Crofts.
Í greinargerð sem fylgdi bréfinu segir:
Þeir Jack D. Ives og Roger Crofts féllust á að meta alþjóðlegt verndargildi Þjórsárvera. Þeir Ives og Crofts hafa víðtæka alþjóðlega reynslu af náttúruverndarmálum, þeir eru nánast gjörkunnugir íslenskum aðstæðum vegna tíðrar dvalar hér og hafi setið í matshópum Alþjóða náttúruverndarsamtakanna (IUCN) vegna Heimsminjaskrár. M.a. veittu þeir umsögn þegar Þingvellir voru nýlega teknir til umfjöllunar og síðar skráðir á Heimsminjaskrá. Að mati stjórnar Landverndar höfðu þeir því afar góðar forsendur til að veita umsögn um stöðu Þjórsárvera í alþjóðlegu samhengi. Ives var hér á landi í júní og Crofts í ágúst. Þeir kynntu sér svæðið og ræddu við sérfræðinga. Þeir skrifuðu sínar skýrslur hver um sig án samráðs hvor við annan.
Að mati stjórnar Landverndar eru megin niðurstöður þeirra eftirfarandi:
1. Þeir telja náttúruverndargildi Þjórsárvera afar hátt, jafnt á landsvísu sem alþjóðlega og líta sérstaklega til þess landslags sem umlykur svæðið.
Ives: ,,Að mínu mati er það þó staðsetning votlendissvæðisins í eyðimörk á miðhálendi Íslands, við suðurenda Hofsjökuls, sem gefur svæðinu afar óvenjulega náttúrulega umgjörð þar sem fram koma sterkar andstæður: svartir eyðimerkursandar, jökulhettur og sífrerafyrirbæri, gróskumikill grænn svörður og fjallahringur í fjarska. Mér kemur í hug samanburður við nokkur svæði heims sem eru fræg vegna landslags: hlutar Tíbetsléttunnar, Sagarmatha (Mt. Everest) þjóðgarðurinn, jökulkrýnd eldfjöll í Andesfjöllum og Altiplano-hásléttan, norðausturhluti Baffineyjar og Yellowstone-þjóðgarðurinn í Bandaríkjunum.”
Crofts: ,,Svæðið allt frá Hofsjökli að þeim stað þar sem Þjórsá fellur fram úr gljúfrunum er í alþjóðlegu samhengi afar mikilvægt bæði vegna lífríkis og þeirrar landmótunar sem það endurspeglar.”
