Það má með réttu segja að skipulagstillaga þessi hefði frekar átt að bera nafnið „Skipulag um fiskeldi á Austfjörðum,” þar sem ekki fer mikið fyrir stefnu svæðisráðs um annað en að verja staðbundna hagsmuni fyrir hönd hagmunaaðila í fiskeldi.
Stjórn Landverndar telur það mjög alvarlegan ágalla á niðurstöðum umhverfismatsskýrslu að ekki virðist hafa farið fram raunverulegt mat á tillögunni vegna áhrifa á náttúru, umhverfi og loftslag.
Svæðisráð hefur augljóslega tekið afgerandi afstöðu með einum hagsmunaaðila. Eðlilegt er að spyrja hvort slík afstaða geti talist réttlætanleg. Einnig má spyrja hvort slík vinnubrögð samræmist jafnræðisreglu og vandaðri stjórnsýslu – þegar nær allir firðir á Austurlandi eru lagðir undir í slíkri vinnu.
Þegar svæði í eigu almennings eru afhent gjaldfrjálst og án útboðs til afnota fyrir sérhagsmuni er sjálfsagt að velta því upp hvort í því felist ekki alvarlegt brot á jafnræðisreglu.
Sú framtíðarsýn sem birtist í Strandsvæðaskipulagi Austfjarða endurspeglar á engan hátt fyrirliggjandi staðreyndir. Skipulagstillagan er ósjálfbær og endurspeglar fyrst og síðast þrönga hagsmuni og fátæklega framtíðarsýn og er í hrópandi andstöðu við umhverfi og náttúruvernd. Hér er einnig farið fram með stefnu sem gengur gegn öðrum mikilvægum hagsmunum og í tilvikum gengið gróflega fram gagnvart meirihluta þeirra samfélaga sem tillagan fjallar um.