Stjórn Landverndar hefur kynnt sér áætlun ríkisstjórnarinnar um aðgerðir í loftslagsmálum.
Um leið og stjórnin fagnar því að slík áætlun hefur verið sett fram ásamt fjármögnun til málaflokksins, þá harmar hún hve lítill hluti ríkisútgjalda er áætlaður í þetta alvarlegasta málefni sem mannkynið stendur frammi fyrir um þessar mundir.
Ljóst er að setja verður skýr, mælanleg markmið og fjármagn þarf að fylgja til þess að láta þau nást, ef ríkisstjórnin ætlar að takast á við loftslagsbreytingar af fullri alvöru.
Landvernd vonast til þess að við næstu uppfærslu verði silkihanskarnir teknir af og ráðist verði í þær kerfisbreytingar sem nauðsynlegar eru til þess að ná árangri hratt í loftslagsmálum.