Við sendum inn umsögn vegna áforma um niðurfellingu laga um leit, rannsóknir og vinnslu kolvetnis og breytingu á lögum um eignarrétt íslenska ríkisins að auðlindum hafsbotnsins. Sjá má umsögnina í heild sinni með því að smella á hnappinn neðst í greininni.
Tímabært að hætta olíuleit
Landvernd styður áformin heilshugar og telur þau nauðsynleg til þess að staðfesta yfirlýstan vilja Íslands í verki til þess að draga úr losun gróðurhúsalofttegunda. Engu er fórnað með því að banna olíuleit- og vinnslu þar sem ekki fer fram virk leit að olíu í lögsögu Íslands. Það er tímabært og mikilvægt að taka af skarið og innleiða bannið með lagasetningu strax.
Í samræmi við orkustefnu
Áformin eru í samræmi við orkustefnu fyrir Ísland þar sem m.a. er gert ráð fyrir því að Ísland verði jarðefnaeldsneytislaust árið 2050, við stjórnarsáttmálann þar sem Ísland skal verða jarðefnaeldsneytislaust fyrir 2040 og við Parísarsáttmálann sem Ísland hefur undirritað.
Landvernd vill nota tækifærið og hrósa ríkisstjórninni fyrir metnaðarfull markmið í loftslagsmálum. Áform þau sem hér er lýst eru góð og ódýr leið til að hefja þessa. mikilvægu vegferð.
Sýnum vilja í verki
Í framhaldinu væri afbragð fyrir íslenska ríkið að gerast aðili að bandalagi þjóða sem hafa skuldbundið sig til þess að leyfa ekki nýja olíu- og gasvinnslu (Beyond Oil and Gas Alliance) og skipa sér þar með í fremstu röð þjóða sem sýna í verki vilja til að takast á við loftslagsvána.
