Við höfum skilað inn umsögn um kynningu á svæðisskipulag Austurlands. Umsögnina má finna í heild sinni neðst í greininni.
Háleit markmið sem stangast á við áform
Stjórn Landverndar fagnar að sveitarfélög sýna í stefnu vilja til að vinna með áætlanir á borð við Heimsmarkmiðin, Landskipulag og græna Evrópusáttmálann. En það er jafn mikilvægt að brýna fyrir þeim sem flagga ýmsum umhverfisvísum í stefnu sinni, að fyrir liggi grundvallar skilningur þeirra sem skreyta sig með jafn háleitum markmiðum.
Því fylgir mikil ábyrgð að flagga háleitum markmiðum og hugtökum í Svæðisskipulagi. Það verkur strax vonir um að til staðar sé framtíðarsýn um nýtingu auðlinda á landi sem í sjó verði í samræmi við þau háleitu markmið. Á Austurlandi lítur stjórn Landverndar sérstaklega til áforma um orkuvinnslu, fiskeldi og fl. sem sannarlega ganga á gæði og nýtingu umhverfis. Með markmiðum um sjálfbærni verða að fylgja raunverulegar aðgerðir til að stuðla að henni í raun og sann.
Íbúar á Seyðisfirði
Landvernd telur margt gott í kynningu á svæðisskipulagi Austurlands eins og eflingu friðlýstra svæði, markmið um fjölbreyttan ferðamáta og verndun hálendis Austurlands. Þessu verður þó að fylgja eftir í verki og áform um enn meiri orkufrekan iðnað, raforkuframleiðslu og fiskeldi samræmast því ekki. Þá er mikilvægt að hlusta á og virða vilja íbúa til dæmis á Seyðisfirði sem leggjast gegn fiskeldi í firðinum.
