Við skiluðum inn umsögn vegna áforma um friðlýsingu hraunhella í Þeistareykjahrauni. Finna má umsögnina okkar í heild sinni neðst í greinninni.
Landvernd fagnar áformum um friðlýsingu hraunhella í Þeistareykjahrauni og styður hana heilshugar. Hraunhellar eru afar fágætar náttúruminjar á heimsvísu líkt og fram kemur í lýsingu Umhverfisstofnunar á verndargildinu. Í Þeistareykjahrauni finnast meðal annars einstök örverulífríki, hraunstrá og dropasteinar sem verða sífellt sjaldgæfari í heiminum.
Mikilvægt að takmarka ágang ferðamanna á svæðinu
Dropasteinar hafa verið friðlýstir á landsvísu1 en því miður hefur sú friðlýsing hefur alls ekki veitt þeim nægilega vernd. Nýleg dæmi eru um mikla eyðileggingu á dropasteinum hér á landi, til dæmis í hellinum Leiðarenda í landi Hafnarfjarðar. Þar hafa örverulífríki einnig orðið fyrir barðinu á ferðamönnum, sem hafa meðal annars krotað nöfn sín á húð hellisveggjanna.
Mikilvægi þess að takmarka ágang á svæðinu ætti að vera öllum ljóst. Það skiptir miklu máli hvernig staðið er að friðlýsingu á svæðinu til þess að tryggja vernd hellana til framtíðar. Að mati Landverndar er nauðsynlegt að Umhverfisstofnun hafi með höndum eftirlit með svæðinu til að koma í veg fyrir frekari eyðileggingu.
Við viljum kortlagningu á hraunhellum Íslands
Á sama tíma og við fögnum friðlýsingunni hvetjum við Umhverfisstofnun til þess að hafa frumkvæði að kortlagningu hraunhella á Íslandi þar sem verndargildi og þörf á friðlýsingum þeirra er metin. Þá þarf Umhverfisstofnun að taka afstöðu til þess með hvaða hætti er best að sjá til þess að hellarnir verði ekki eyðilagðir vegna ágangs ferðamanna.
