Stjórn Landverndar fagnar þeim áformum að friðlýsa Bessastaðanes en lýsir þó yfir áhyggjum af því að svæðið sé ekki friðað í heild sinni. Á svæðinu eru mikil náttúrverðmæti í húfi, vistgerðir sem hafa alþjóðlegt verndargildi og alþjóðlega mikilvægt fuglasvæði. Svæðið er einnig mikilvægt til útivistar og náttúruskoðunar. Til viðbótar hafa sjálfir Bessastaðir sögulegt gildi sem aðsetur forseta Íslands.
Eftirfarandi texti er brot út umsögn Landverndar vegna málsins. Umsögnina í heild sinni má finna með því að smella á hnappinn neðst í greininni.
Aðeins hálf tjörnin í friðlýsingunni
Markmið friðlýsingarinnar er að vernda og varðveita til framtíðar náttúrulegt ástand svæðisins sem búsvæðis fugla og mikilvægt viðkomusvæði farfugla vor og haust. En til markmiðsins heyrir einnig varðveisla líffræðilegrar fjölbreytni og fræðslu- og útivistargildi í grennd við þéttbýli.
Áhyggjur stjórnar Landverndar beinast að verndun Bessastaðatjarnar. Friðlýsingin nær einungis til eystri helmings tjarnarinnar. Það er ólíklegt að hægt sé að ná framangreindum verndarmarkmiðum nema að tjörnin sem heild og vatnsbakkar hennar njóti verndar. Tjörnin sem heild og vatnsbakkinn er jú eitt vistkerfi. Verði hluta vistkerfisins raskað er hætt við að því sem heildinni sé ógnað. Sú hætta vofir yfir.
Áformað er að fara með golfvöllinn alveg niður að bökkum Bessastaðatjarnar. Þá er svæðið á milli tveggja læna sem gang vestur úr Tjörninni notað sem „græna (green)“. Gangi þessi áform eftir mun þrengja mjög að fuglalífi við Bessastaðatjörn.
Mikilvægt að vernda alla Bessastaðatjörn
Svæðið eins og það er í dag, með nálægð friðlands Kasthúsatjarnar og votlendis hefur mikið upplifunargildi fyrir bæði íbúa og gesti, til dæmis sem fuglaskoðunarsvæði. Hætt er við að þetta spillist ef farið verður að framlögðum tillögum.
Við hvetjum því þá aðila sem hafa unnið að þessar friðlýsingu til að staldra við og vinna að heildsteyptri friðun svæðisins og með tjörnina alla í huga, okkur og kynslóðum framtíðarinnar til heilla, og til verndar á öllu því merkilega lífi sem þrífst svo vel á þessu svæði. Til þess verður að vernda Bessastaðatjörn sem heild auk vatnsbakkanna.
