Vatnasvið Skaftár er með næsthæsta verðmætamat allra landsvæða sem fjallað var um í faghópi 1 í 3. áfanga rammaáætlunar. Þar fékk virkjunarkosturinn hæstu áhrifaeinkunn allra virkjunarkosta sem til umfjöllunar voru, bæði hjá faghópi 1 og faghópi 2. Í niðurstöðum faghóps 1 kemur fram að Búlandsvirkjun myndi hafa í för með sér rof á einstæðri jarðfræðilegri heild og spilla ummerkjum Skaftárelda sem eru einstæðar minjar á heimsvísu.
Stjórn Landverndar styður friðlýsinguna heilshugar og bendir á að svæðið hefur verið rannsakað ítarlega og náttúruverðmæti þess gríðarlegt. Full ástæða er til að veita svæðinu öfluga vernd umfram vernd gegn orkuvinnslu. Hið minnsta telur Landvernd að fara verði að náttúruverndarlögum og lögum um orkunýtingu og vernd landssvæða og friðlýsing látin gilda gegn allri orkuvinnslu.
