Hækkun fiskeldisgjalds
Landvernd styður heilshugar hækkun á fiskeldisgjaldi skv. 30. gr. frumvarpsins en telur hækkunina vera lágmarkshækkun þó samtökin hafi skilning á því að erfitt gæti reynst að hækka gjaldið mikið í einu skrefi.
Orkusjóður og Loftslagssjóður
Í samanburði við Orkusjóð er Loftslagssjóður mun faglegri og gagnsærri. Þar eru birtar stuttar lýsingar á þeim verkefnum sem fá styrki, fagráð metur umsóknir og leiðbeiningar til þess eru opinberar á netinu. Upphæðir sem þessir sjóðir hafa yfir að ráða eru hins vegar alls ekki sambærilegar, tæpur milljarður hjá Orkusjóði (og 8,6 milljarðar eftir hækkun) en einungis um 100 milljónir hjá Loftslagssjóði.
Markmið Orkusjóðs eru óskýr, gagnsæi lítið og fagleg umgjörð veik. Engin skilyrði eru sett um fagþekkingu hjá stjórn sjóðsins og hvorki háskólasamfélagið né umhverfisverndarsamtök fá að tilnefna fulltrúa í hana. Auk þess eru engar kröfur á þau fyrirtæki sem njóta styrkjanna um sjálfbærni, samfélagslega ábyrgð eða samdrátt í losun gróðurhúsalofttegunda.
Fyrirhuguð aukning styrkja úr ríkissjóði til einkaaðila frá árinu 2020 (bara í gegnum styrki til nýsköpunarfyrirtækja og Orkusjóð) er 18 milljarðar, fara úr 5,6 milljörðum í 23,6 milljarða til ársins 2024.
Efnahags- og viðskiptanefnd Alþingis er hvött til að láta skoða styrki úr ríkissjóði til einkafyrirtækja með það í huga að gerðar verði skýrar kröfur um kolefnisbókhald fyrirtækja sem njóta hárra styrkja, að verkefnin sem fái styrki stuðli að sjálfbærni og séu í takt við heimsmarkmið Sþ.
Ennfremur hvetur Landvernd til eftirlits og eftirfylgni með því að fyrirtækin stundi raunverulega nýsköpun eða geti sýnt fram á samdrátt í losun gróðurhúsalofttegunda og að styrkhæf starfsemi þeirra stuðli að sjálfbærni.
Stjórn Landverndar bendir á að í gegnum úthlutanir á opinberu fé til einkaaðila verður ríkið að grípa tækifærið og gera skýrar kröfur um sjálfbærni og samdrátt í losun gróðurhúsalofttegunda.
