Forsætisráðuneytið hefur birt drög að grænbók um sjálfbært Ísland, fyrsta skrefið í mótun stefnu Íslands um sjálfbæra þróun.
Landvernd þakkar þennan mikilvæga áfanga og sendi inn athugasemdir og ábendingar varðandi grænbókina.
Í grænbókinni er orðið sjálfbært notað á margvíslegan og mismunandi hátt án þess að ljóst sé hvaða merking býr að baki hverju sinni. Dæmi um óljósa framsetningu á orðinu og hugtakinu sjálfbærni eru m.a.: sjálfbær nálgun, sjálfbær hagþróun, efnahagsleg sjálfbærni landsins, sjálfbær rekstur hins opinbera, sjálfbærni ríkisfjármála, sjálfbær fjármögnun, sjálfbær innkaup ríkissjóðs, sjálfbær þekkingariðnaður, umhverfislega sjálfbærar samgöngur, sjálfbær innviðauppbygging og sjálfbær kvikmyndagerð. Ekki er ljóst hvaða skilgreining býr að baki þessum hugtökum.
Er hér t.d. alltaf horft til allrar þriggja stoða sjálfbærrar þróunar eða er orðið einfaldlega misnotað í þeirri meiningu að eitthvað á að bera sig sjálft? Slík frjálsleg notkun á þessu flókna og mikilvæga hugtaki sem sjálfbærni er gerir það að verkum að orðið glatar merkingu sinni og verður „tómt“.
Þar sem grænbókin á að hafa leiðandi áhrif á sjálfbæra þróun á Íslandi skiptir mjög miklu máli að orðanotkun sé skýr og rétt og ekki beitt í þeim tilgangi að stimpla eitthvað sem sjálfbært án viðmiða og reglna.
Röng notkun hugtaksins sjálfbærni stuðlar ekki að því að farið verði í nauðsynlegar aðgerðir í átt að sjálfbærri þróun.
