Tungnaá rennur úr vestanverðum Vatnajökli. Áin rennur frá sporði Tungnaárjökuls um svarta sanda, meðfram móbergshryggjum, mosabreiðum og eldstöðvum og því má segja að náttúrufar Tungnaár og umhverfis sé merkilegt á heimsvísu. Tillagan var sú að stíflustæði Tungnaárlóns yrði í farvegi Tungnaár fyrir ofan fyrirhugaða Bjallavirkjun og var lónið nauðsynleg forsenda þeirrar virkjunar. Með því að setja virkjunarhugmyndirnar í verndarflokk fékkst samfellt verndarsvæði milli Vatnajökulsþjóðgarðs og Friðlands að fjallabaki. Framkvæmdir hefðu haft áhrif á verðmætt landslag á mörkum Friðlands og í jaðri Vatnajökulsþjóðgarðs, en svæðið er mikilvægt ferðamennsku allan ársins hring.