Fyrirhugað er að vinna til útflutnings 60 – 75 milljónir m3 af efni meðfram og út frá strandlengjunni við Landeyjahöfn utan netalaga. Vinnslutíminn er áætlaður 30 ár miðað við að árleg efnistaka sé um 2 milljónir m3.
Efnistaka í sjó við Landeyjahöfn er háð leyfi Orkustofnunar í samræmi við lög nr. 73/1990, með síðari breytingum, um eignarrétt íslenska ríkisins að auðlindum hafsbotnsins og skipulag á haf- og strandsvæðum.
Ljóst að hér er um gríðarlega stórtæk áform að ræða þar sem áhrifin yrðu af áður óþekktri stærðargráðu þegar kemur að efnistöku af sjávarbotni við Íslandsstrendur.
Stjórn Landverndar telur að Skipulagsstofnun verði að krefjast þess að matsskýrsla kveði skýrt á um væntan samdrátt í losun gróðurhúsalofttegunda af framkvæmdinni og taka tillit til þess að efnið kemur í stað úrgangsefnis frá kolaorkuverum sem verða til taks hið minnsta næstu tvo áratugina en ekki sementsklinkers nema óbeint.
Að mati stjórnar Landverndar er efnistaka upp á 2 milljónir tonna óraunhæf og í raun í andstöðu við markmiðið um að draga úr losun gróðurhúsalofttegunda næstu tvo áratugina.
Landvernd vill spyrja Skipulagsstofnun að því hvort ekki sé ástæða til þess að skyldar framkvæmdir eins og hafnaraðstaða og mölunarverksmiðja í Þorlákshöfn verði metnar samhliða þessari framkvæmd.
Að samanteknu er það mat Landverndar að það væri bæði fyrirtækinu og samfélaginu í Ölfusi og náttúrunni fyrir bestu að blása þetta verkefni af hið fyrsta.
