Landvernd fagnar því að unnið sé að því að fá alþjóðlega viðurkennda vottun á loftslagsverkefnum Yggdrasil Carbon í Múlaþingi.
Að ýmsu er þó að hyggja. Til dæmis þarf að tryggja að verkefni um kolefnisbindingu dragi ekki úr hvata til að minnka kolefnislosun. Hvernig ætlar Yggdrasil Carbon að tryggja þetta varðandi starfsemi sína? Eru t.d. kröfur gerðar um að minnka losun um ákveðið hlutfall, t.d. 50%, áður en fyrirtæki mega nota kolefnisbindingu inn í kolefnisbókhaldið?
Á hvaða hátt er tekið tillit til þess að kolefnislosun og kolefnisbinding með skógrækt fer fram á ólíkum tíma? Losun koltvísýrings sem fer út í andrúmsloft núna hefur áhrif í langan tíma. Að binda sama magn af koltvísýringi með nýskógrækt tekur hins vegar áratugi.
Nýskógrækt á Íslandi með erlendum trjátegundum hefur sína kosti og galla og er umdeild. Þess vegna bendir Landvernd á að nauðsynlegt sé að horfa ekki á hvert stakt verkefni heldur meta verkefni á sömu svæðum sem eina heild – til að meta samlegðaráhrif þeirra á líffræðilega fjölbreytni, náttúruvernd, landslag og sérkenni íslenskrar náttúru.
Landvernd sendi Yggdrasil Carbon umsögn um málið.
