Land og saga, fræðsla fyrir skólahópa í Alviðru

Hvað leynist í landslaginu? Hvað getum við komið auga á ef við lesum í landið?

Markmið heimsóknarinnar er að vekja athygli á hvernig hægt er að „lesa í landið“ og sjá þá umhverfið dálítið í nýju ljósi. Alviðra hefur upp á margt að bjóða hvað varðar jarðfræði og sögu lands og þjóðar.

Dagskrá

Í hlíðum Ingólfsfjalls má sjá sjávarkamb frá ísaldartímanum og sæbarið grjót sem vitnar um þær miklu breytingar sem hafa orðið á landinu okkar frá því fyrir óralöngu.

Frá Alviðru má sjá hvernig Grímsneseldar hafa mótað landið, hvernig gróður hefur náð að festa þar rætur í tímans rás og hvernig mannshöndin hefur haft þar áhrif.

Hlaðinn túngarðurinn vitnar um forna búskaparhætti og enn má sjá gamla þjóðveginn sem lá meðfram fjallinu.

Gamlar tóftir beitarhúsa segja sína sögu, Ferjutanginn vekur upp spurningar um samgöngur liðinna ára og svo má lengi telja. Jafnvel útihúsin sem enn standa eru nú úr takti við nútímann og gefa innsýn í liðna daga.

Við Alviðru eru ármót Sogs og Hvítár, þar mætast tær bergvatnsáin og jökulfljótið og mynda Ölfusá, vatnsmestu á landsins.

Gengið verður um svæðið eftir því sem henta þykir og aðstæður leyfa.

Dagskrána má aðlaga mismunandi aldurshópum og allir aldurshópar grunnskóla eru velkomnir.

Bókanir og fyrirspurnir

Senda má allar óskir um bókanir og fyrispurnir á netfangið hjordis(hjá)landvernd.is