Orkunýtingarflokkur
Stóra-Sandvík á Reykjanesi er flokkuð í orkunýtingarflokk í 3. áfanga Rammaáætlunar.
Stóra Sandvík er löng sandfjara á vestanverðu Reykjanesi þar sem krafmikil náttúra og fjölbreytt fuglalíf mætir hrauni, sjávarhömrum og sprungugjám.
Einstakt svæði á heimsmælikvarða
Reykjanes einkennist af eldvirkni og jarðhita og varð hluti af verndaráætlun Unesco árið 2015. Það er því viðurkennt sem UNESCO Global Geopark fyrir jarðfræðilega sérstöðu sína á heimsvísu.
Náttúruperlan Stóra-Sandvík á Reykjanesi. Myndband: Ellert Grétarsson, elg.is
Vinsæll ferðamannastaður
Stóra Sandvík er vinsæll áfangastaður ferðamanna. Á svæðinu eru einstakir sandhólar og sjávarlón. Í næsta nágrenni er „Brúin milli heimsálfa“ og Stampar, gossprungur sem liggja frá sjó inn í land á vestanverðu Reykjanesi og mynda gígaraðir. Svæðið er einnig þekkt sem brimbrettaparadís.
Lífríki
Á svæðinu er eitt stærsta kríuvarp landsins. Krían ferðast yfir hálfan hnöttin að varpstöðvum sínum hér í á norðurslóðum frá vetrardvalarstað sínum í Suður-Atlantshafi.
Krían hefur verið friðuð tegund á Íslandi síðan 1882.
Krían er talin vera í nokkurri hættu, í flokki UV skv. válista Náttúrufræðistofnunar Íslands 2018.
Virkjanaáform
Í bígerð er 50 MW virkjun sem er kennt við Stóru Sandvík sem mun ná yfir sjálfa víkina, gígaröðina Stampa og vinsælan áfangastað ferðamanna á Suðvesturlandi, „Brúna milli heimsálfa“.
Það þarf ekki að hugsa lengi um þau hörmungaráhrif sem virkjun á þessu svæði myndi hafa á svæðinu enda yrði fegurð þess fótum troðin með virkjun. Umhverfisstofnun lagði til í náttúruverndaráætlun 2004-2008 að svæðið yrði gert að friðlandi (Reykjanes, Eldvörp og Hafnaberg).
Þó að svæði sé komið í orkunýtingarflokk, þá er ekki þar með sagt að þar verði örugglega virkjað. Það á eftir að framkvæma umhverfismat og stjórnvöld geta gefið leyfi til rannsókna og orkuvinnslu. Á þessu stigi má hafa áhrif með því að vekja athygli almennings á svæðinu og því sem er í húfi og senda athugasemdir um leyfi.
