Þeistareykir eru öflugt háhitasvæði norðan við Bæjarfjall á milli Mývatnssveitar og Kelduhverfis. Þar er 90 MWe jarðgufuvirkjun Landsvirkjunar með tveimur hverflum. Búið var á Þeistareykjum fyrr á öldum og þar var brennisteinn numinn. Jarðhitasvæðinu á Þeistareykjum er skipt í austur- og vestursvæði en talið er að svæðið geti í heild staðið undir allt að 270 MWe raforkuframleiðslu. Fram til þessa hafa boranir miðast við vinnslu á austurhluta svæðisins. Boraðar hafa verið sex djúpar rannsóknarholur á austurhluta svæðisins og ein 400 metra kjarnahola á vestursvæðinu.