Tungnaá rennur úr vestanverðum Vatnajökli. Áin rennur frá sporði Tungnaárjökuls um svarta sanda, meðfram móbergshryggjum, mosabreiðum og eldstöðvum og því má segja að náttúrufar umhverfis Tungnaá sé merkilegt á heimsvísu. Eitt stærsta raforkuver landsins, Hrauneyjafossstöð, er eitt þriggja raforkuvera sem virkja Tungnaá. Hrauneyjafossstöð stendur í jaðri hálendisins á Sprengisandsleið. Stíflur eru 1,5 km ofan við Hrauneyjarfoss og u.þ.b. 5 km neðan við Sigöldustöð og mynda þær 8,8 km² dægurmiðlunarlón. Frá lóninu liggur 1 km aðrennslisskurður í norður um lægð í Fossöldu að inntaki við norðurbrún öldunnar og þaðan pípur að stöðvarhúsi. Frárennslisskurður er rúmlega kílómeter að lengd og liggur út í Sporðöldukvísl sem rennur í Tungnaá. Virkjunin er með uppsett afl 280 MW.