Laxá í Aðaldal er lindá sem rennur úr vestanverðu Mývatni. Náttúrufegurð umhverfis Laxá er mikil enda rennur hún um hraun, bakkar hennar eru grónir og lífríki fjölbreytt. Laxárvirkjun var reist í þremur áföngum árin 1939, 1953 og 1973. Hart var deilt um þriðja áfanga og varð hann aðeins brot af því sem áformað var. Sáttagerð í Laxárdeilunni fól í sér að ekki verður virkjað meira í Laxá nema landeigendafélag vatnasvæðisins heimili það. Einnig var stofnað náttúruverndarsvæði árið 1974 með sérlögum, Verndarsvæði Mývatns og Laxár, en það var svo minnkað stórlega með lögum árið 2004.